ඇත්තටම මේ මෝදි මොන වගේ මිනිහෙක්‌ද?

වීරයා:          ස්‌වාමි විවේකානන්
අදහන්නේ:   කාලි මාතාව
ලග්නය:       වෘශ්චික
නිතරම: 1    හිස පීරනවා
නිතරම: 2    කණ්‌ණාඩියෙන් බලනවා
යාළුවෝ:      විශේෂ කවුරුත් නෑ
මෝදිගේ සම්පූර්ණ නම නරේන්ද්‍ර ද මෝදර් දාස්‌ මුල්චාන්ද් මෝදිය. මෝගල් අධිරාජ්‍යයකු වන අක්‌බාර් දුර්බාර්ගේ පාලනයට යටත්ව පැවැති ගුජරාටි ප්‍රාන්තයේ වද්නගර් මෝදිගේ උපන් ගමය.

හින්දු සහ බෞද්ධාගම මිශ්‍රව පවතින වද්නගර් භාරතයේ ජනප්‍රිය ගායක යුවළක්‌ වූ දුමිතානා සහ රිරීගේ උපන් ගමද වේ. මෝදි උපන්නේ 1950 සැප්තැම්බර් 17 වැනිදාය. ඔහුට සහෝදරයන් හතරදෙනකු සහ සහෝදරියක සිටී. මෝදි විවාහ වූයේ ජසෝදබෙන් චන්මෙන්ලාල් සමඟය. නමුත් ඔවුන් විවාහයෙන් පසු වෙන්විය.

මෝදි ඉතා පිරිසිදුව පිළිවෙළට ඇඳුම් ඇඳීමට ප්‍රිය කරන්නෙකි. තැලුණු පොඩිවුණු ඇඳුම් ඇඳීමට ඔහු අකමැතිය.

ඉතා දිළිඳු පවුලක උපන් මෝදි තරුණ වියේදී තම ඇඳුම් මැදගැනීම සිදුකළේ පිත්තල සෙම්බුවකට උණු වතුර පුරවා එහි උණුසුමිනි.

මෝදි ලස්‌සනට ඇඳුම් ඇඳීමට කොතරම් ප්‍රිය කරන්නේ ද කියා වටහාගත හැක්‌කේ ගෙවුණු වසර දෙක තුළ ඔහු සියයකට අධික කුර්තා ප්‍රමාණයක්‌ මිලදී ගෙන තිබීමෙනි. ඔහු මහජනයා අතරට යන්නට පෙර තමා අඳින්නේ කුමන වර්ගයේ කුර්තාවක්‌ ද එහි වර්ණය කුමක්‌ විය යුතුද කියා විමසිලිමත් වේ. මෝදි අත් ඔරලෝසු පැළඳීමට සහ සෙරෙප්පුවලට ඉතා ප්‍රියකරන්නෙකි.

ඔහු ඉතා පිරිසිදුව සිටීමට පමණක්‌ නොව තමා ජීවත්වන නිවස හා අවට පරිසරය ද පවිත්‍රව තබාගැනීමට මහත් උනන්දුවක්‌ දක්‌වන්නෙකි. ඔහු තමා පරිහරණය කරන මේසය ඉතා පිරිසිදුව සහ පිළිවෙළකට තබාගැනීමට උත්සාහ ගනී.

මෝදි ප්‍රසිද්ධ දේශනයක්‌ පැවැත්වීමේදී දර්ශන තිර භාවිත කිරීමට ඉතා කැමැතිය. එමගින් තොරතුරු සහ වාර්තා ඉදිරිපත් කරමින් පැහැදිලි කරදීම්වලට ඔහුට ප්‍රිය කරයි.

ඔහු මුදල් වංචාවට අකමැතිය. වැය කරන සෑම මුදලක්‌ම නිසි ආර්ථික වටිනාකමක්‌ සහිත විය යුතු බව සිතයි.

මෝදි වැඩි වේලාවක්‌ සිටගෙන සිටින විට ඔහුගේ කොඳුඇටපෙළ පෙදෙසේ වේදනාවක්‌ මතුවේ. දෙපා ඉදිමුමට ලක්‌වේ. බටහිර පන්නයට අකමැති වුවත් ඔහු බටහිර අත් ඔරලෝසු කෙරෙහි දැඩි ගිජුකමක්‌ දක්‌වයි.

මෝදිට හොඳින් ඉංග්‍රීසි දැනුම ඇත. නමුත් චතුර ලෙස කතා කළ නොහැකිය. දේශපාලන විද්‍යාව පිළිබඳ උපාධිධාරියෙකි. වෘශ්චික ලග්නය හිමි මෝදිට 2014 සැප්තැම්බර් වනතුරු රාහු අන්තර් දශාවේ පවතී. එය ඔහුගේ දේශපාලන දිවියට යහපත්ය. සෑම වසරකම නව රාත්‍රි උත්සවයේ දින නමයම චාරිත්‍රානුකූලව ගතකරන මෝදි එම දිනවල ආහාරයට ගන්නේ පලතුරු පමණි.

මෝදි කාලි මාතාව කෙරෙහි දැඩි භක්‌තියකින් පසු වේ.

රුපියල් කෝටි 70 ක්‌ වැයකර කාලි මාතාව වෙනුවෙන් ගබ්බාර් කඳුවැටියේ "ශක්‌තිපීත්" ආශ්‍රමයක්‌ ඉදිකර ඇත.

සෑම උදෑසනකම මෝදි අන්තර්ජාලය සමඟ සම්බන්ධ වෙමින් තමා වෙත එවා ඇති අන්තර්ජාල පණිවුඩ විමසා බැලීමට හුරුව සිටී.

මෝදි තීන්දු තීරණ ගැනීමේදී සෘජු බවක්‌ දක්‌වයි. තමා විසින් තීන්දු ගැනීම මිස අන් අයගේ තීන්දු තීරණ ක්‍රියාත්මක කිරීමට ප්‍රිය නොකරයි. මෝදිට විශ්වාසවන්ත සමීප යාළුවෙක්‌ නැත. ඔහු හුදකලා දිවියක්‌ ගෙවයි. තම ආරක්‍ෂකයන් ගැන දැඩි අවධානයක්‌ දක්‌වයි.

රාජකාරියටම කැප වූ මෝදි සිය රාජකාරි කටයුතු ආරම්භ කරන්නේ පෙරවරු 7.00 ටය. රාත්‍රි 10 පමණ වනතුරු රාජකාරි කටයුතුවල නිරත වේ. මෝදි කණ්‌ණාඩිය ඉදිරිපිට වැඩි වේලාවක්‌ ගතකරමින් තම සිරුර ගැන වෙහෙසේ. එහිදී ඔහු නිරූපණ ශිල්පියකු මෙන් හැසිරේ. කාර්යාලයෙන් පිටත යැමට පෙර කණ්‌ණාඩිය ඉදිරියට ගොස්‌ තම ඇඳුම් පැළඳුම් ගැන විමසා බලයි.

වසර කිහිපයක සිට මෝදි ඉතා තද වර්ණ ඇඳුම් පැළඳුම් භාවිතයට යොමුවී ඇත. ඔහුගේ සාක්‌කුවේ නිතරම පනාවක්‌ තිබේ. තම මෝටර් රථයේ විවිධ වර්ණයන්ගෙන් යුත් සාටක ඇත. ජනතාව ඉදිරියට යැමේදී එම අවස්‌ථාවට ගැලපෙන සාටකයක්‌ පැළඳ හොඳින් කොණ්‌ඩය පීරා මෝටර් රථයෙන් පිටතට පැමිණේ.

මෝදි නිදාගන්නේ පැය පහකට අඩු කාලයකි. ඔහු නින්දට ගියේ කුමන වේලාවක වුව අලුයම 5.00 හෝ 5.30 වන විට අවදි වේ. මෝදි කවි ලිවීමට දක්‍ෂය. නමුත් එම කවි ගුණාත්මක බවින් අඩුය. මෝදිගේ වීරවරයා ස්‌වාමි විවේකානන්දය.

මෙලෙස ඉන්දීය නව අගමැතිවරයාගේ ගතිගුණ සහ දින චර්යාව ගැන තොරතුරු පළවුවත් කෝටි සියයකට අධික ජනගහනයක්‌ පාලනය කිරීමේ වගකීම අද (26 වැනිදා) සිට සිය දෑතට පවරා ගත් පසු මෙම චර්යාවන් සහ ගතිගුණ නොවෙනස්‌ව පවතීදැයි කියා අනාවැකි පළ කළ නොහැකිය.

නරේන්ද්‍ර මෝදි යනු ඉතා දුප්පත් පවුලක උපත ලැබුවෙකි. පදික වේදිකාවේ තේ කොළ විකුණමින් ද ආපනශාලාවල තේ සකසමින් ද මුදල් උපයාගෙන අරමුදලක්‌ ආරම්භ කළ මෝදි තමා ඉගෙනුම ලැබූ අහමබාද් විදුහල වටා තාප්පයක්‌ ඉදිකළේය. එවිට ඔහුගේ වයස අවුරුදු 20 කි. අද ඔහුගේ වයස අවුරුදු 64 කි. එනිසා නරේන්ද්‍ර මෝදි යනු අරමුණුවලින් පොහොසත් අධිෂ්ඨානශීලී තමා උපන් රටට අසීමිතව ආදරය කරන පුද්ගලයෙකි.

උපාලි ද සේරම්